Catlin-a dle coste sëcche
Avia avù boneur , Carlin , avia acetà ëd travajé për i tedesch , a motiv ëd l'età era stàit lassà a ca , mentre sòj coscrit ero stàit ciamà an t' la riserva , chiel avia scampala , fasìa al cantoné , arbatìa le rive dle stra e con ël fen che a fasìa anlevava na vaca , an paira ëd crave e 'n pòchi ëd lapin , pa 'n gran che ma dal moment che an coj temp lì a ij era pòch da mangé , era na vera cucagna , travajava bandà ma la duminica , apress Mëssa, fasìa na scapà a l'òsto dal " Pont ëd pera " andoa as fasìa an quartin e na man a carte con ij amis. L'òsto era ciamà për parèj përchè për intré tocava traversé , al pont ëd pera a caval la bialera dal Partitor , che traversava tut ël pais , minca tant le pere dle lavandere a s'as sporsìo andrinta , lì le fomne andasìo arzenté ai linseuj apress faìt la lëssìa .
A la sima ëd la stra ad Volvera , an pòch prima ëd l'òsto , che fasìa canton con la Stra Nassional , a ij-era la ca dë Spìrit , lì , ij alman dòp avèj fàit dëslogé le famje avio stabilì al comand , avio sernù costa ca përchè era la pi àuta dal pais e avia an lusernè an si cop , da lì era fàcil ten-e d' euj le contrà e ten-e a distansa i " Widerstandsräuber ", visadì coj che noi dijoma "partigian". Tut al pais avia giutà lë Spirit a tramudé da n' àutra part , an t' na ca d' afit.
Con al passé dal temp i soldà tedesch avio comensà fe amicissia con i paisan , soens cand ero lìber andasìo a l' òsto a bèive na vira .
Col invern lì fasìa na frèid da ste sèch e Karl , an soldà ëd servissi al comand , dòp avèj smontà da la guardia era fasse an bel bagn an t' eva gelà dla pompa , mentre an " Kamerata " pompava ; chiel era ficasse sota slansand-se dabin , apress avia pompà chiel e al bagn avia falo l' àutr, tornà vestisse , ero andàit fé na vira a l' òsto a pié quaicòs për argalé 'l cheur .
L' òsto era già pien , i paisan ero surtì da Mëssa e antant che spetavo l' ora ëd disné fasìo doe paròle ëd dnans an bicer . Karl e al compagn ero conossù , baratavo ëd tabach con en bicer ëd vin , intrà pontajavo al tron contra la muraja e tacavo dé ëd manà an sle spale ai paisan , cand as capiss pòch la lenga i gest a son d' agiut për fe amicissia , antant che schersavo e s - boronavo , un pistava la coa al can che saotand fora ëd corsa da sota al bancon, s' angambarava an tal tron c' à cascava për tèra , ij partija an colp , ricòcava contra la vòlta e ciapava an pien Carlin , tombava a tèra sensa manch an braj , restavo tuti antërdoà , sensa capì lòn che ij era capitaje , Karl corìa a tiré su al tron da tèra e al can scapava sota n' àutra tàula , mach òr caidun vëddija Carlin arvers për tèra an t' en baciass ëd sangh ,
cercavo ëd giutelo, ëd co i soldà alman lo tiravo su durvendje la mantlin-a , ma a ij era pi gnente da fé , Carlin che era riussì ste a ca , lontan dal front e da le bataje , era restà sèch a l' òsto , con so bicer ëd barbera an man .
Cand " Catlin-a dle còste sëcche " decid ëd ven-e tambusse a tò uss ëd lass pa gnun stërmatori c' à fasso
.
'l nini