Ij Bogianen

1747,Pian dl' Assieta :
matin del 19 Luj

Ël magior - brigadié Cont ëd an Bastian a sàusa ansima a la gran masera,tirà su .ant la neuit .tut arlongh dël pian ëd l' Asseta, e a dis : "Messieurs les granadiers dël Re , Guardie dël Casal , Guardie dël Forgiatz , ij Fransèis - ij sente? - Bato già la charge . Ciamé nen vàire ch' a son : a son tanti , des vòlte pì che noi. E a l' han quatòrdes pess ëd canon .E a vniran - iv lo dijo mi -a ondà sempre pì s - ciasse , pi rabiose Ma noi an ciamo Ij bogianen. E l' ordina l'è sempre col : sté ferm e risparmié l' cartatoce" Ël magior - brigadié Cont ëd San Bastian, drit su la masera dël pian ëd l' Assieta a séguita a dì :" Messieurs les grenadiers dël Re, guardie dël Casal , guardie dël Forgiatz , tnì bin a ment lò ch' iv dijo : le cartatoce , ch'i l' eve , son l' ùltime : ma , finìe , av resro ancora le bajonëtte , le cròsse dij fusij e ij roch , e le pere e j' onge . Veteran dla Vràita, dl' Argentera , dl' Orm, scoté lò ch' iv dijo :Se ij Fransèis a passo , se l' Gran Serin a casca , ël Piemont a l'é fotù".
E ij Fransèis a rivo : quarantamila contra setmila. Pìfer e tamborn ai dan drinta 'd pì ch' a peulo Quatòrdes pess ëd canon a sparo a tut andé . E la còlona dël general Arnaud as fa sota.
A rivà a sent méter : e ij nòstri cito.
A riva a sinquanta : e ij nòstri gnente .
A tranta a pija ël destans : Urrah! Urrah!
Ël magior - brigadié Cont ëd San Bastian , drit ansima a la masera a comanda : "Feu !".
Prim assàut : finìe le munìssion.
Scond assàut : bajonëtte e cròsse dij fusij.
Ters assàut : ròch, pere, lastron.
Quart assàut a la disperà : general cavajer Bellisle e general Arnaud a la testa 'd quatsent ufissiaj : ij nòstri a l' han pì nen né fusij ,né bajonëtte , né ròch ai resta mach pì j' onge e ij dent . Anlora, mòrt për mòrt , a sàuto adòss ai nemis, mòrt për mòrt.
E ant la mòrt a treuvo la vitòria.

Arrigo Frusta