I GIVO
Avio cujì na brancà ëd givo sota la leja ,e l'avio ficaje an tal fassolèt , e 'l fassolèt an tla cartela . Madlinòt avia dane sinquanta lire për caté la cicolata për colassion , capitava pà soens , ëd sòlit an butava pan e pom , o pan con l' euv , ma sicome avia vendù i lapin , avia dane la bon-a man , Ceser avia sùbit vorsù la soa , e për parej ero passà a cateje , an tant che endasio vers la scola , coj bej givo gròss come doe vòlte al pòles ero na tentassion tròp gròssa , e parej an tant che ciuciavo la cicolata con 'na man , con l' àutra sgatavo an mess le sterne sota ij plato , apress tornavo pèr la stra dla mura andoa dal giardin dla Cichina je sporsìa na rassarolera , con al temperin da ausse ij cravion tajavo an pòchi ëd bòsso e si ficavo an sacòcia , poej partio ëd corsa vers la scòla . Rivavo a la sima dla Rubatera che gia al bidel stassia sonand la ciòca , fassio na corsa , rivavo an classe tuj sbafumà , la magistra an vardava de stòrt ma disìa gnente , era giumaj costumà , al Ceser tut lustr , con al lìber duert as voltava gnanca , an tant che tuti an pé stasìo disend la preghiera , noi es butavo a l' ùltim banch , an tal canton d ij aso , cercavo ëd rangesse an pòch , es lavavo le man con lë spuv e tiresse su ij caussèt a la scagassa . 'l nini
Ero tuti setà a vardé la magistra c' à scarabociava an sla lavagna , mi e Pinòt da sota al banch avio tirà fora dal pachèt i givo e a dòi a dòi ij avio anfilaje con al bòsso an manera che stejso da fianch , cand avio preparane doe cobie a pr'un , avio lassaje andé , lor cioch da la luce ò magara dal mal partìo tuti slansà , voland ras-ciand ij ale , passavo an sla testa dle fije setà dnans a noi e tombavo ai pé dla magistra , le fije criavo come le galin-e e fassio ij òche , tant për fe le sbernuffie , la magistra ciamava
:" Chi è stato? "
Noi ciuto fasìo finta ëd gnente e s-vardavo an gir , la magistra an ciamava :" Voi due! Ne sapete nulla? " noi dòi con l' aria pi nossenta dal santin pendù al burò ëd Mare granda " No ! Signora Maesta ! Sono arrivati da quella parte ..." e marcavo vërs al Ceser .
Dòp an paira ëd paròle , la lesion arpiava e noi , pen-a avio gavane ij euj da adòss , avio tornà a gieughe con i givo , al bidel intrava con l' al fiasch dl' inciòstr e tacava a empì i calamai , e lì che le vnune l' ideja degna ëd " Leonardo da Vinci " .
Tra an givo e l' àutr en filavo an tòch ëd quaderno an rotolà com an sigarèt , a la sima , al toch che sporsìa lo sbringiòlavo , prima ëd lasseje andé lo pociavo al t' l ' inciòstr al vòl era na maravija , darmage che ero vnuit grev e dòp pen-a an paira ëd méter ' na cobia tombava an sla schina dla Licia Fussa maj capità !! La Licia e la Giana tacavo crié come doe fòle , Al Ceser parland a n' italian për blaghé dnans la magistra " Quando torniamo a casa lo dico alla nonna !!! Così imparate!! " La magistra cercava ëd calmé i crij dle fije , Pinòt voltandse vers so frel Ceser , " E mi ëd don tante ëd cole lëcche che 't arcordes fin che te scampe ". Chi as butava da nòsta part contra je spion , chi con al Ceser , la fin sentend tuta sta ciarnaja intrava al bidel .e noi finìo an tal coridor . Apress la lession an portavo dal diretor , scrivìa quaicòs an sal quaderno , noi stassio con ij euj bass sperand che an lassejsa andé , anvece an disìa :" Domani venite accompagnati dai vostri genitori " Tramentre tornavo a ca ij disìa a Pinòt :" E or come foma
a dijlo a nòste mare? ".
" Trambla pà Nini che al Ceser , avrà ëd sicur già dijlo a tuti ; spetava nen àutr col rufian !! "
Era pròpi vèr , pen-a rivà a ca ,avia contà tut e cò ëd pì .
Magna Ghitin ne spetava an mes la cort con le man an si fianch e na gora bin strèita e pen-a rivà tacava fichenje e an sal cul e an sle gambe patanùe antant che al Ceser an vardava dala fnestra grignand sodisfàit . Con nòstra sorprèisa Mare Granda surtìa da n' ca e disìa " Lassje sté !!. Dòp ij penso mi !!! Vanta pa che caidun abio sodisfassion !!. " Për parej loma amprendù che manch a Mare granda ij piasìo je spion .
Për na sman-a l'oma pi nen mangià al bonèt a tàula , loma dovù porté i crin an pastura e mach dòp avèj copià e amprendù a memòria tuta na pagina dal Vangelo la gavane dal castigh , ma loma avù la sodisfassion ëd vëdde al Ceser ciché da la rabia .